Coloquio cunha Nobel: encontros nun attosegundo con Anne L’Huillier

Convidamos a toda a comunidade ao encontro “Coloquio cunha Nobel: encontros nun attosegundo con Anne L’Huillier”, organizado pola ÁREA XOVE de SEDOPTICA e LUZADA USC.

Será unha oportunidade única para conversar de xeito próximo coa Premio Nobel de Física 2023.

Datos clave da cita:

• Data e hora: Venres 2 de outubro, de 11:00 a 12:00 h.

• Lugar: Salón de Actos do iMATUS.

• Modalidade en liña: Podes conectarte en directo a través desta [ligazón].

(Entrada libre ata completar o aforo)

Anne L’Huillier (París, 1958) é unha destacada física franco-sueca, profesora de física atómica na Universidade de Lund (Suecia) e unha das mentes máis brillantes no campo da óptica ultrarrápida. En 2023, foi galardoada co Premio Nobel de Física, converténdose na quinta muller da historia en recibir esta honra, xunto con Pierre Agostini e Ferenc Krausz. O comité da Fundación Nobel recoñeceu os seus innovadores métodos experimentais para xerar pulsos de luz de atosegundos para estudar a dinámica dos electróns na materia. Tras obter o seu doutoramento en Física en 1986 na Universidade Pierre e Marie Curie de París, L’Huillier fixo historia en 1987 ao descubrir a xeración de harmónicos de alta orde despois de pasar un láser infravermello a través dun gas nobre. Este descubrimento sentou as bases da física de atosegundos (unha billonésima de milmillonésima de segundo), o que permitiu o desenvolvemento de ferramentas ópticas capaces de capturar e filmar o movemento ultrarrápido dos electróns a escala cuántica. Ao longo da súa carreira, o seu traballo pioneiro foi recoñecido con prestixiosos premios internacionais como o Premio Wolf de Física (2022), o Premio Fronteiras do Coñecemento da Fundación BBVA (2022) e o Premio L’Oréal-UNESCO “Para as Mulleres na Ciencia” (2011). Ademais da súa excelencia investigadora, é coñecida polo seu forte compromiso coa docencia e coa promoción da visibilidade e o avance profesional das mulleres nas disciplinas científicas.