iMATUS celebrou o taller “Computación e Intelixencia Artificial” no campo dos materiais, en colaboración con investigadores do grupo RNASA-IMEDIR da Universidade da Coruña, co obxectivo de avanzar na integración da dixitalización e a Intelixencia Artificial (IA) na investigación de materiais.
A iniciativa enmárcase no contexto da Advanced Materials Act (AMA), unha estratexia da Unión Europea deseñada para fortalecer a competitividade industrial, reducir as dependencias estratéxicas e acelerar a transición cara a unha economía máis sostible, resiliente e dixital.
O encontro serviu como foro de debate e análise sobre a incorporación da IA e a computación avanzada como ferramentas rutineiras de procesamento de datos no campo dos materiais, co obxectivo de facer que o desenvolvemento de novos materiais e as súas aplicacións sexa máis rápido, racional e eficiente. O taller identificou ferramentas transversais para tender pontes entre a experimentación na ciencia e tecnoloxía dos materiais e a dixitalización.
